Министрите за надворешни работи на земјите-членки на БРИКС денеска започнаа со дводневен состанок во Њу Делхи, во период кога блокот се соочува со сериозни предизвици, вклучително и поделби околу војната во Иран, растот на цените на енергијата и зголемената глобална економска неизвесност.
На средбата учествуваат дипломати од Бразил, Русија, Индија, Кина и Јужна Африка, како и претставници на поновите земји-членки. Состанокот се одржува во време кога конфликтот во Иран предизвикува нарушувања во глобалното снабдување со енергија и дополнителен раст на цените на нафтата. Воедно, средбата се совпаѓа и со посетата на Кина од страна на американскиот претседател Доналд Трамп.
На состанокот присуствуваат и иранскиот министер за надворешни работи Абас Аракчи и рускиот шеф на дипломатијата Сергеј Лавров. Кина ја претставува амбасадорот Сју Феихонг, додека министерот за надворешни работи Ванг Ји остана во Пекинг поради посетата на Трамп. Индискиот министер за надворешни работи Субрахманјам Џајшанкар изјави дека разговорите ќе бидат насочени кон глобалните и регионалните предизвици, како и кон продлабочување на соработката меѓу земјите-членки.
Во своето обраќање, Џајшанкар оцени дека БРИКС може да им помогне на земјите во развој поефикасно да се справат со здравствените и финансиските предизвици, како и со високите цени на енергијата, храната и ѓубривата.
„Се среќаваме во период на значајни промени во меѓународните односи“, изјави тој, додавајќи дека земјите во развој сè повеќе очекуваат БРИКС да има „конструктивна и стабилизирачка улога“.
БРИКС беше основан од Бразил, Русија, Индија и Кина како сојуз на големи економии во развој, замислен како противтежа на западните институции, како што е Г7. Јужна Африка се приклучи во 2010 година, а блокот дополнително се прошири во 2024 година со Египет, Етиопија, Иран и Обединетите Арапски Емирати. Индонезија стана полноправна членка во 2025 година.
Групата настојува да го зајакне своето влијание во глобалниот поредок, кој со децении е доминиран од САД и западните сојузници. БРИКС добива поддршка во делови од Глобалниот Југ, каде што постојат критики кон финансиските институции предводени од Западот.
Сепак, земјите-членки и натаму имаат сериозни разлики околу клучни прашања. Индија и Кина продолжуваат да се натпреваруваат за регионално влијание, додека војната во Украина дополнително ги продлабочи несогласувањата во рамките на блокот.
Проширувањето на БРИКС создаде и нови предизвици, бидејќи различните регионални интереси го отежнуваат усогласувањето на заеднички ставови. Тензиите дополнително се засилија поради конфликтите на Блискиот Исток, особено имајќи предвид дека Иран и Обединетите Арапски Емирати, и покрај спротивставените интереси во регионот, се дел од истата групација.
Заменик-министерот за надворешни работи на Иран вчера изјави дека несогласувањата меѓу членките на БРИКС во врска со конфликтот на Блискиот Исток го спречиле блокот да изгради единствен став.