„Услови за уставни измени нема“. Вака кратко одговори на министерот за надворешни работи и надворешна трговија, Тимчо Муцунски, за тоа какви односи можат да се очекуваат со новата бугарска влада, со огледе на најавите кои стигаат од Софија дека идната влада на Румен Радев нема да ги менува позициите кон Македонија, но и по најавата на премиерот, Христијан Мицкоски, дека односите со Бугарија ќе се вжештуваат.
Муцински иако не објасни какво „вжештување на односите“ очекува премиерот, рече дека Македонија е секогаш подготвена за дијалог со Бугарија, за што немало интерес од претходна влада таму.
- „Сакам да бидам кристално јасен, во овој контекст, нашата држава не е подготвена за уставни измени. Има недостаток на доверба и недостаток на кредибилитете по однос на испораката кон нас како држава. Такашто, во овој момент услови за уставни измени нема и владата не е подготвена да преземе каков било чекор кон уставни измени“, рече Муцунски.
Муцунски сепак изрази надеж дека има свест во Софија дека европската интеграција на Македонија е значајна за целиот регион.
Муцунски денеска му беше домаќин на генералниот секретар на Советот на Европа, Ален Берсе, кој ја пофали Македонија за брзото усвојување на акцискиот план за малцинствата, додека за неисполнувањето на 17 пресуди од Судот за човекови права од страна на Софија кои се однесуваат на правото на регистрација на здруженија на Македонците во Бугарија, рече дека е направен напредок во таа насока, особено во изминатиот месец.
- „Работиме на тоа и имаме веќе добар напредок во последните 12 месеци и сега е подобро од претходно. Според мене можам да ви кажам дека тоа може да биде конкретно и практично спроведување, не смее да биде само симболично. Ако имаме регистрација на тие здруженија тоа треба на конкретен начин да се спроведе. Според мене, досега имаме добар напредок и ќе биде можно да се спроведат тие одлуки“, рече Берсе.
Според Берсе, Комитетот на министри наскоро повторно ќе разговара на темата исполнување на пресудите од страна на Бугарија, уверувајќи дека Советот на Европа не сака симболични решенија туку стабилно и солидно.
Берсе кој е во прва официјална посета на земјава рече дека Македонија игра многу важна улога за стабилноста и демократската отпорност во регионот и континентот.
Тој порача дека стабилноста и безбедноста на различните региони се поврзани и оти во моментот постои неопходност да се има силен систем на одбрана кога повторно има вооружување во Европа.
Тамара Грнчароска
Б.С.