Вишиот управен суд ја поништи одлуката за престанок на важноста на спојувањето на концесиите за рудникот Иловица, со што се отвора ново поглавје во долгогодишниот спор околу проектот на „Евромакс Ресорсис“.
За пресудата денеска беше информирана Владата од страна на Министерството за енергетика, рударство и минерални суровини, при што беше посочено дека станува збор за конечна судска одлука која институциите се должни да ја почитуваат.
Од Владата нагласуваат дека случајот е наследен од претходни одлуки донесени во 2023 година, кога во јуни беше донесена одлука за спојување на концесиите, а само еден месец подоцна беше донесена одлука за нивен престанок. По тие одлуки беше поведена судска постапка, која заврши со пресуда на Вишиот управен суд.
Владата соопшти дека е свесна за загриженоста на дел од граѓаните, локалното население и граѓанските организации поврзана со проектот Иловица и најави дека сите натамошни чекори ќе се преземаат транспарентно, врз основа на стручни анализи, законските процедури и институционалните надлежности.
„Наш приоритет останува создавање услови за економски раст, нови инвестиции и отворање работни места, но тоа никогаш нема да биде на сметка на здравјето на граѓаните, природните ресурси и животната средина. Заштитата на јавниот интерес, почитувањето на највисоките еколошки стандарди и целосната законитост на постапките остануваат принципи од кои Владата нема да отстапи, велат од Владата.
Оттаму уверуваат дека јавноста ќе биде навремено информирана за секое понатамошно постапување во предметот.
Сузана Мицева