Голем број граѓани денеска се собраа на протест организиран од граѓанската иницијатива „Стоп за Усје“ под слоганот „Не за нова дозвола на Усје по стари правила“. Со транспаренти, свирежи и извици „Стоп за Усје“, демонстрантите маршираа од Жена парк до Министерството за животна средина и просторно планирање, барајќи построги еколошки стандарди и поголема заштита на животната средина и здравјето на граѓаните.
Протестот беше организиран поради барањето на Цементарницата за продолжување на А-интегрираната еколошка дозвола. Од иницијативата сметаат дека не смее да се дозволи продолжување на дозволата според, како што велат, застарени стандарди за загадување и побараа надлежното министерство да ги повика на разговор и да ги сослуша нивните барања.
Од Цементарница Усје, пак, велат дека постапката за продолжување на А-интегрираната еколошка дозвола се спроведува согласно важечката законска регулатива и дека сите документи се јавно достапни за увид.
„ТИТАН Усје строго ги почитува сите обврски што произлегуваат од важечката регулатива и останува целосно посветена на усогласување со сите идни законски решенија што ќе стапат во сила. Резултатите од редовните и контролните мерења потврдуваат дека сите параметри се во рамки на законски пропишаните вредности, при што дел од нив континуирано се повеќекратно пониски од максимално дозволените лимити“, велат од „Титан Усје“.
Учесниците на протестот порачаа дека ќе продолжат да ја следат постапката и очекуваат институциите транспарентно да ги разгледаат нивните барања пред да донесат конечна одлука.
Тамара Марковска