Има граѓани кои сакаат да ја изиграат државата и да земаат извори на финансирање од различни институции, нагласи Максим Ацевски, главен државен ревизор, во вечерашното интервју во „Топ тема“ на Телма ТВ.
„Во ревизорски извештај констатиравме дека за една година, 259 лица злоупотребиле 18.457.000 милиони денари, поради тоа што земале по различни основи. Класичен пример, земате пензија, во исто време земате социјална помош. Зошто? – Поради тоа што дел од администрацијата, вработени во Центарот за социјална работа не успеале или не сакале да погледнат и да ги проверат кои што се јавно достапни помеѓу Фондот за пензиско и инвалидско осигурување и во самите центри за социјална работа“, изјави Ацевски.
Ревизорската активност, додаде тој, се темелела на впарување на податоците.
„Дадовме препораки до самите центри за социјална работа да преземат активности, да издадат решенија за поврат на средствата. Но, во исто време известени се надлежните органи да постапат и преземат мерки и активност за понатамошно постапување. Она што не можам да го разберам како главен државен ревизор е зошто досега не се преземени одредени активности за оние лица кои што се работно способни, а се приматели на социјална помош, да не бидат ангажирани за општествено корисна работа“, посочи Ацевски.
С.Д.