Министерството за земјоделие, шумарство и водостопанство не го добило Предлог-законот за заштита и благосостојба на животните со допис и заверен со архивски број и затоа официјално, како што велат за Телма, го немаат добиено документот. Ова е одговорот од министерството за тоа каде се „загуби“ Предлог-законот на релација АХВ – Земјоделие, откако Телма во петокот објави дека е изготвен Предлог-закон за благосостојба на животните со кој се предвидуваат ригорозни казни за физички лица за несоодветно чување домашни миленици, но и за злоупотреба, мачење и нанесување болка на животните кои би се движеле и до 5.000 евра.
Од министерството тогаш тврдеа дека го немааат, а од АХВ, кои го изготвиле законот, пак, дека им го испратиле. Сега, како што дознаваме, се очекува АХВ документот да го испрати со допис и архивски број.
Инаку Предлог-законот чија крајна цел е намалување на бројот на напуштени и бездомни кучиња предвидува задолжително микрочипирање и регистрација на секој миленик и задолжителна стерилизација за кучиња.
„Забрането е држење на кучиња и мачки кои не се идентификувани и регистрирани во електронската база на податоци на Агенцијата. Идентификација и регистрација на кучиња и мачки се врши најдоцна на возраст од 90 дена, односно при прва вакцинација“, се наведува во Предлог-законот.
Со овој Предлог-закон за првпат животните се препознаваат како чувствителни суштества и дека мора да се земат предвид нивните физиолошки и психолошки потреби, но и нивното однесување.
„Сопственикот и/или одгледувачот на животното е должен да се однесува спрема животното со внимание на добар домаќин и да му обезбеди животни услови кои одговараат на неговиот вид, раса, пол, возраст, како и на физичките, биолошките и производствените специфики, особини во однесувањето, односно здравствената состојба на животното“, предвидува Предлог-законот.
Кој ќе напушти домашен миленик ќе добие забрана за идно чување миленици
Предлог-законот забранува и продажба и давање на подарок домашни миленици на малолетници, движење на домашен миленик на јавна површина без присуство на сопственикот, трајно чување на домашно милениче на адреса различна од живеалиштето или местото на живеење на сопственикот, но и присилување на животните на работа која го надминува нивниот физиолошки капацитет, здравствена или кондициона способност.
Тамара Грнчароска