Кои се крупните професионални грешки што според владата ги направил државниот обвинител и дали ќе го објават предлогот за разрешување на Коцевски, од Владата ни одговорија дека јавноста веќе ги знае причините. Дополнуваат и дека пратениците на јавни расправи ќе одлучуваат „за“ или „против“ евентуално разрешување на јавниот обвинител и јавноста ќе биде детално запознаена.
„Владата работи согласно со владини процедури кои треба да минат и истиот потоа да биде испратен до Советот на јавни обвинители. Во однос на информираноста на јавноста, како Влада цениме дека досега комплетно транспарентно ги комунициравме причините, а во однос на крупните професионални грешки цениме дека целата македонска јавност е добро запозната, што се докажува и со 2% доверба која граѓаните ја имаат во правосудството“, велат од владата.
Премиерот на денешната седница за пратенички прашања ги повторои критиките за Коцевски, но ги нагласи превирањата во обвинителството и „Бонусите на СЈО“, предмет за кој токму ВМРО-ДПМНЕ поднесе кривична пријава.
Вишиот обвинител Јован Цветановски, кој го водеше предметот за „Бонусите на СЈО“ беше суспендиран откако беше поведена дисциплинска постапка заради нестручно и несовесно работење во четири предмети во кои се откажал од жалба или обвинение. Дисциплинска, но и кривична постапка, се води и за неговиот шеф Мустафа Хајрулахи кој е, исто така, суспендиран.
Тој го обвинуваше Коцевски дека му вршел притисок за овој предмет, државниот негираше, а сите овие обвинувања почнаа по најавите на премиерот дека власта ќе му даде шанса на државниот обвинител да се покаже пред да бараат смена. Неколку месеци подоцна владата ја почна постапката за разрешување.
Откако предлогот за разрешување ќе пристигне во Советот, тие имаат законски рок од 15 дена да дадат позитивно или негативно мислење. Државниот обвинител не учествува на таа седница, но има право писмено да одговори на обвинувањата во предлогот од владата. Советот го испраќа мислењето во Владата, а според изјавите од власта, извесно е дека постапката ќе оди до крај со гласање во парламентот каде Коцевски може да присуствува и да се произнесе по предлогот. Потребни се 61 глас за да биде разрешен државниот обвинител. Тој веќе се изјасни – дали ќе биде разрешен законски или не, ќе цени јавноста, но рече дека не направил крупна професионална грешка.
Елена Ивановска Мукоска