Не постои несоодветност околу која нашите политичари не се извежбани, вели истакнатиот српски режисер Егон Савин , за изборот на текстот „ Народен пратеник“ , од комедиографот Бранислав Нушиќ, кој што викендов беше премиерно изведен на малата сцена на Македонскиот народен театар. Со оваа претства МНТ ја продолжува прославата на осумдецениското постоење. За 80 години, ова е трета постановка на „ Народен пратеник“ во МНТ и трета соработка на Савин со театарот.
- Се работи за корупција, се работи за недолично однесување, кое што е воведено во нашиот политички живот како нешто нормално. И лажење, измама, и ветување, и за лудиот радување. Нема едноставно, не постои таа несоодветност , околу која нашите политичари не се извежбани. Многу вешто тоа го прават, како да се ликови од Нушиќ, вели Егон Савин, режисер и автор на адаптацијата на текстот.
Дејствието во оваа сатира го следи обидот на трговецот Јеврем Прокиќ да биде избран за пратеник од власта, додека неговиот иден зет, Ивковиќ, е кандидат за пратеник од опозицијата. Во постановката на Егон Савин , ликот на вереникот на Даница- ќерката на Прокиќ , што ја толкува Дарја Ризова , е скратен заедно со уште 11 други, со цел да се потенцира алчноста и подготвеноста на неподобните поединци како Јеврем, да дојдат до власт.
- На него не му недостигаат пари или такви нешта. Тој е богат човек. Ама, му недостига народна доверба, слава, почести, такви работи. И затоа влегува во една сулуда авантура , каде што троши еден куп пари, подмитува, прави… Ама, на нашата публика сѐ тоа и е многу добро познато, вели Александар Микиќ, актер што го толкува ликот на Јеврем Прокиќ.
Во претставата играат и докажаните актери: Тони Михајловски, Тања Кочовска и Јордан Симонов. Нивните комични карактери го манифестираат личниот интерес од можното стапување на власт на Јеврем.
Сценографијата е на Весна Поповиќ, автор на костимите е Роза Трајческа- Ристовска, а дијалектната адптација на текстот, на скопски говор, ја направи Томислав Османли.
Накусо, „ Народен пратеник“ е остра критика на паланечкиот менталитет и занимавање со политика. Како што напишал Нушиќ кон крајот на 19 век, нештата до денес не се променети, за жал.
Сотир Трајков