Во Штип за една година се продадени станови, чија вредност се проценува на 13 милиони евра. Интерес за купување има и за старите, но и новите градби. Досега се продадени 270 станови низ населбите и централното градско подрачје.
Ако изминатите години станови купуваа турски државјани, кои студираат во Штип, оваа година е година на домашните купувачи од Штип и од соседните градови во регионот.
Градежните компании во моментов градат нови 200 станови, кои во 2025 година ќе бидат евидентирани во штипското даночно одделение.
Со цел да се излезе и во пресрет на граѓаните кои сакаат да градат нови куќи, општината ќе понуди градежни парцели на две локации, едната е во непосредна близина на булеварот „Партизанска“ и втората е во проградската населба Три Чешми, каде што деновиве веќе се продадени и 10 парцели за индивидуално домување.
Поради големиот интерес за инвестирање во недвижности во Штип, во 2025 година ќе се работи 44 плански документации, финансирани од приватни инвеститори, но и од самата Општина. Со изградбата на линија два градот ќе се шири од населбите Пребег и Железничка до бањата Кежовица и Ново Село.
Викторија Димитрова Јованова