„Храбар и решителен”, биле карактеристиките со кои поранешната германска канцеларка Ангела Меркел, во своите мемоари, го опишала екс премиерот и до пред две години лидер на СДСМ, Зоран Заев.
Германскиот новинар Михаел Мартенс на социјалната мрежа Икс дава кус осврт за делот од мемоарите на Меркел, кој се однесува на Западен Балкан, при што тврди дека Заев е единствен (жив) политичар од регионот, спомнат во делото на моќната германска политичарка.
Меркел, како што открива германскиот новинар, не ги споменува ниту српскиот претседател Александар Вучиќ, ниту премиерот на Албанија, Еди Рама, ниту Бојко Борисов, ниту поранешниот српски претседател Борис Тадиќ. Во мемоарите не биле спомнати ниту поранешниот грчки министер за финансии Варуфакис, ниту, пак, екс премиерот на Австрија, Себастијан Курц.
Новинарот Мартенс тврди дека за некои политичари-современици на Меркел, канцеларката не ги спомнува како еден вид казна затоа што или биле недоверливи или не биле посакувани за соработка.
Мемоарите на Меркел се на 720 страници (оригинална верзија на германски јазик) и ќе бидат промовирани во над 30 држави истовремено. Германската „железна лејди” преку широката промоција на своите мемоари сигурно ќе оствари влијание на јавната сцена, особено пред клучните германски избори догодина.
Особено ќе биде интересна промоцијата на мемоарите во Вашингтон пред да почне вториот мандат на Доналд Трамп. За неговото прво владеење со САД, Меркел нема многу фини зборови и го опишува како политичар кој се однесува како агент за недвижности во глобалната политика, открива новинарот на ФАЗ, Мартенс.
Мартенс имал пристап до мемоарите на Меркел и тврди дека најчест бил рускиот претседател Владимир Путин, кој бил споменат над 140 пати во мемоарите кои се викаат „Слобода: Мемоари 1954-2021“.
Меркел ги опишува својот живот во Источна Германија од времето на комунизмот, промените во германската политика по падот на Берлинскиот ѕид и обединувањето, нејзиниот политички пат под менторство на легендарниот канцелар Хелмут Кол, како и нејзината кариера како најмоќна жена во светската политика во 21-от век.