Скопската Зоолошка градина се пофали со нов подмладок кај белите волци. Во ова живеалиште се родени две мали волчиња, кои во првите недели од животот најголемиот дел од времето го поминуваат покрај својата мајка.
Од Зоолошката градина информираат дека младенчињата засега ретко можат да се забележат од посетителите, бидејќи природно се кријат во дупки и засолништа, исто како што тоа го прават и волците во дивината.
„Кај нашите бели волци пристигна подмладок – две мали волчиња кои веќе ја освојуваат љубопитноста на целиот тим. Тие сè уште се нежни и најсигурни покрај својата мајка, која внимателно ги чува и се грижи за нив. Најчесто се кријат во дупки и засолништа, па фотографиите се направени во ретки моменти кога излегуваат надвор и љубопитно го истражуваат просторот“, велат од Зоолошка градина Скопје.
Од таму додаваат дека мајката постојано се грижи за младенчињата и им обезбедува сигурна средина за раст и развој.
Белите волци се меѓу поатрактивните животни во скопската зоолошка градина, а раѓањето на новите младенчиња претставува позитивна вест за програмите за одгледување и зачувување на овој вид во контролирани услови.