По кратко боледување, на 69 годишна возраст почина Слаѓана Милошевиќ, вокалистка, гитаристка , кантавторка и писателка, пренесуваат српските медиуми.
Милошевиќ важеше за една од иконите на новиот бран во 80-тите години на минатиот век , во поранешна Југославија. Свиреше виолина од мали нозе, а нејзиниот прв солистички настап бил 1974 година во Маглај, на фестивалот „ Студентско лето“. Вистинскиот пробив на југословенската по- рок сцена го направила 1977 со нумерата „ Ау, ау“. Истата година настапила пред „ Бјело дугме“ на нивниот култен концерт на Ајдучка чешма. Изгледот на Слаѓана Милошевиќ кој до крај остана особен и авангарден беше само дополнување на нејзината музика и песни. Таа ги скрши табуата со песната „ Секси дама“, која во прво време беше забранета за емитување на радио и телевизија.
Во 1979 година ја промовираше нумерата „Амстердам“, а во 1981 година настапи на изборот за југословенскиот претставник за Евровизија во Белград и го освои осмото место, со композицијата „Рецепт за љубов“. Во 1983 година го објави албумот „ Neutral Design“, со истоимената група што ја формира во Германија, а материјалот доживеа голем успех и таму и во Шведска. По една година со Дадо Топиќ ја сними песната „Принцеза“, изведена на Скопскиот фестивал каде се избираа песни за Евровизија, но и тогаш не и се насмевна среќата да победи. Во 1989 , Слаѓана Милошевиќ замина во САД, каде извесен период свирела со групата „Бејби сестра“, работела како брокер и во маркетинг агенции.
Слаѓана Милошевиќ во 2001 година , заедно со Јасмина Малешевиќ ја издаде книгата „ Адаме не се лути“.