Први реакции откако Агенцијата за филм ги објави резултатите од ланскиот втор конкурс за поддршка на долги и кратки, играни, документарни и анимирани филмови. Одбиениот режисер Васил Христов вели дека не очекувал ништо друго од телата кои одлучувале по конкурсот и бара да се засрамат за одлуката. А, режисерот Радован Петровиќ прашува зошто не се одобрени долгометражни филмови за авторите – дебитанти.Од Агенцијата велат дека одбиените кандидати може да се жалат кај второстепените органи. Најмногу пари (453 илјади евра) на овој конкурс доби режисерот и продуцент Кастриот Авдили, за неговиот трет филм „ Роден да живее“.
Режисерот Васил Христов, кој е одбиен на ланскиот втор конкурс на Агенцијата за филм, што заврши кон крајот на август, реагираше на социјалните мрежи дека не очекувал ништо друго од директорот, Филмскиот совет и од Управниот одбор на Агенцијата.
Васил Христов – режисер: Треба да ви е срам, но не ви е. Мојата работа ќе продолжи и многу подолго после вас кои ќе останете само како дамка од шпагета на бел чаршав.
Со реакција се јави и режисерот Радован- Раша Петровиќ: Како нема ниту еден дебитантски долгометражен филм? Тешко е да се дебитира во оваа земја.
Од Агенцијата за филм велат дека одбиените кандидати имаат право на жалба.
Агенција за филм: Како и во секој конкурс, има проекти за кои Филмскиот совет и Управниот одбор не донеле одлука за финансирање. Незадоволните кандидати имаат право на жалба до Второстепените органи.
Овој конкурс понуди исклучителни проекти, а доминантен е македонскиот мнозински филм, со фокус на детскиот. Тоа ќе придонесе најмладата публика да гледа македонски филмови од рана возраст и да ја почитува националната кинематографија, дополнуваат од Агенцијата за филм. Тие, најмногу пари- 453 000 евра му доделија на режисерот и продуцент , Кастриот Авдили за неговиот трет филм „ Роден да живее“.
Покрај овој, во категоријата долгометражен игран филм со домашен мнозински удел, подржани се и остварувањата на Стојан Вуичиќ и Кристијан Ристевски. На Вуичиќ, за детскиот филм „ Снешко“, му се одобрени 421 000 евра, а Ристевски за „ Не се согласувам“, ќе добие 405 000 евра. Од долгометражните играни филмови со македонски малцински удел, најмногу пари- 48 000 евра ќе добие хрватскиот филмски и телевизиски режисер Даниел Кушан.Подржани се и два долгометражни документарни филмови со домашен мнозински удел. Од поддржаните , Роберт Јанкулоски и Мерита Сали Чочоли, повеќе пари – 56 000 евра ќе добие Чочоли, за „Последниот сведок“. Прифатени се два долгометражни документарци со македонски малцински удел.
Исто толку кратки играни филмови со домашен мнозински удел и четири филмови од дебитантите: Леон Ристов, Филип Лафазановски, Ментор Нуредини и Сара Бајрами. Подржан е и краткиот документарен филм “ Трнлив пат“ на Кузман Клековски. Во истата категорија, со домашен мнозински удел, се прифатени и три дебитантски филмови. Вук Митевски е поддржан за краток анимиран филм со домашен мнозински удел. Во оваа категорија е прифатен и дебитантскиот филм на Илија Тодоровски, наменет за најмладата публика „ Лефти и Рајти“. А, со македонски малцински удел е поддржан филмот „ Роксанда“ на Драган Јовиќевиќ.
Сотир Трајков