Музичарот Бени Шаќири е избран за директор на Младинскиот културен центар (МКЦ). Тој беше еден од тројцата кандидати, заедно со дипломираниот продуцент, филмски работник и магистер по менаџмент за човечки ресурси Никола Мадиќ и Владимир Стојчевски, дипломиран продуцент, професор на ЕФТА и магистер по менаџмент за јавни установи. Според условите во конкурсот, покрај високото образование од областа на хуманистичките науки, кандидатите за директор на МКЦ треба да имаат и петгодишно работно искуство во областа на културата. А, Управниот одбор на МКЦ ги доставил апликациите од сите тројца кандидати до градоначалничката Арсовска, која ставила потпис на решението за директор на Шаќири.
Телма се обиде да го добие Шаќири за коментар, но беше недостапен на телефонските повици. За неговиот избор за директор, кандидатот Мадиќ кажа дека нема да реагира, а Стојчевски ни одговори дека ќе се жали согласно законските можности откако ќе го добие решението дека е одбиен. Наместо на 28 декември, Шаќири е назначен за директор на 10 јануари, па сега е неизвесно дали законскиот рок за жалби на одбиените кандидати е пробиен или не, велат од МКЦ.
Пред една година вработените во МКЦ и дел од граѓаните, протестираа поради разрешувањето на Ванчо Богоев од в.д. директор и назначувањето на таа функција на дипломираниот детектив Никола Алексов, примен во МКЦ преку Агенцијата за привремени вработувања. Богоев беше разрешен зашто не попушти под притисокот на раководството на Град Скопје да го вработи Бени Шаќири. Иако од МКЦ потвдија дека тој денеска дошол на работа, од таму кажаа и дека уште официјално не се сретнале со него и дека сѐ уште добиваат задачи за работа од Алексов.
Сотир Трајков