Имиња на починати писатели и поети осамнаа во ажурираниот список на членови на Друштвото на писатели на Македонија, верификуван од потпишаната претседателка на Собранието, Кристина Николовска. Тоа го вклучи алармот кај членството за можно местење гласови на претстојното Вонредно изборно собрание на 25 ноември. Од асоцијацијата бараат достоинствено спроведување на изборите. А, претседателката на Собранието со одговор дека работат на допрецизирање на списокот.
Во ажурираниот список на членови на Друштвото на писатели на Македонија, верификуван од потпишаната претседателка на Собранието, Кристина Николовска, има имиња од починатото членство , но и лице кое си заминало од Друштвото. Ова создава недоверба кај останатите членови дека на Вонредното изборно собрание, закажано за 25 ноември, кога ажурираниот список ќе биде избирачки, може да се манипулира со гласовите на починатите писатели и поети: Радован Павловски, Владимир Костов,Никола Кочовски, Драги Михајловски и Луан Старова, велат од асоцијацијата.
„Постои недоверба затоа ние будно ќе ја следиме ситуацијата. Тој список кој што е ажуруран и кој што треба дополнително да биде ажуриран е јавен, достапен секому, нели се наоѓа на веб страницата на ДП, во категоријата Членови. И ние нема да дозволиме до крај да останат вакви пропусти“, вели писателката Фросина Пармаковска.
Од ДПМ бараат професионално и достоинствено спроведување на изборите. Имаат разбирање за апелот на Николовска за трпение и соработка, но велат дека нема да дозволат местење на изборите. А, претседателката на Собранието, Кристина Николовска вели дека работат на ажурирање на списокот, дека ќе биде допрецизиран и јавно објавен 10 дена пред одржување на Вонредното изборно собрание.
Членството на ДПМ реагираше претходно зашто во електронскиот адресар според кој требаше да бидат известени за одржување на Вонредното изборно собрание, имаше помалку од една четвртина од вкупниот број членови и се посомневаа за местење на изборите. Тогаш претседателката на Собранието кажа дека ќе направат нов , комплетен адресар и дека техничката секретарка работи на тоа, интензивно.
На Вонредното изборно собрание на ДПМ ќе се бираат претседатели на Друштвото и на Собранието и членови на Претседателството и на други тела на асоцијацијата. Изборите ќе се одржат откако мнозинството членови од Претседателството поднесоа оставки на 6 октомври, незадоволни од работата на раководството. По нив следеше сагата со пиши- бриши оставките на претседателот на ДПМ, Христо Петрески, кој официјално поднесе оставка на 17 окомври.
Сотир Трајков