Годинашната програма на Неделата на јапонски филм во Кинотека на РС. Македонија загатнува теми за секојдневните предизвици со кои се соочуваат претставници од различни демографски групи во јапонското општество. Во рамките на фестивалот ќе бидат прикажани 5 филма кои ја разоткриваат богатата јапонска кинематографија загатнувајќи ги темите за љубовта, стареењето и губењето на сеќавањата, предизвиците со кои во општеството се соочуваат луѓето со аутизам, можноста за идентификација и емпатија.
Следната година е триесет годишнината од воспоставувaњето на дипломатски односи помеѓу Јапонија и Северна Македонија. За таа цел ќе се потрудиме да биде година исполнета со впечатливи настани кои уште повеќе ќе ги приближат нашите народи. Во таа насока, би сакале да ве информираме дека покрај дистрибуцијата на јапонски филмови, Јапонската фондација работи и на спроведување на сеопфатни меѓународни програми за културна размена низ целиот свет, изјави јапонскиот амбасадор Оцука Казуја.
Дебитантскиот филм „Барем љубов“ на младиот режисер Косаи Секине, со кој започнува Неделата на јапонски филм ја обработува темата на еден општествен проблем наречен хикикомори. Се работи за специфичен тип на повлеченост од општеството што се појавува кај младата популација во Јапонија.
Во овој случај овој фестивал ни помага да ги забележиме заедничките човекови драми што се искусуваат во секоја култура и ја приближуваат Јапонија до обичниот граѓанин на Македонија. Филмовите кои ќе ги видиме на јапонскиот филмски фестивал се нискобуџетни, независни филмови, ангажирани визуелни драми на млади режисери за кои се надевам ќе не тргнат од секојдневието и ќе не поттикнат на размислување, вели директорот на Кинотека Владимир Ангелов.
Битола ќе биде домаќин на Неделата на јапонскиот филм на 9 и 10 ноември. сите проекции се бесплатни, но со граничен капацитет.
Нина Стефанова