Ристовски: Потребен ни е перфектен натпревар за победа
Репрезентацијата на Украина е следниот предизвик за македонската селекција во квалификациите за Европското првенство. По стартната победа над Малта, составот на Благоја Милевски посакува нов триумф на домашен терен, но за нови три бода овој пат потребно е да се одигра на највисоко можно ниво.
“Украина е една од селекциите која ја сметаат за „нефаворит“, ама играат одличен фудбал. Ако сакаш нешто повеќе со вакви селекции, не може само да се браниш, мора нешто да направиме и во офанзива, да задржиме топка. Во фудбалот сѐ е можно. Ни треба максимален фокус од прва до последна минута. Спремни сме и се надевам со поддршка од навивачите која ќе ни биде ветер во грб ќе дојдеме до позитивен резултат”, истакна капитенот на репрезентацијата Стефан Ристовски.
Последен пат со Украинците се соочивме на Европското првенство во Букурешт, но овој дуел сигурно дека ќе биде поразличен од оној пред две години.
” Со нив игравме на Европското првенство, а покажавме две различни полувремиња. Направивме грешки кои ривалот ги казни. Ако сакаме да се надеваме на резултат на домашен терен, тогаш ќе мора да одиграме максимално и ни треба еден перфектен меч”, заврши Ристовски.
Натпреварот се игра утре на арената Тодор Проески, а почетокот е закажан за 20 часот и 45 минути.
ФОТО: Игор Паневски