Македонската фудбалска репрезентација влегува во завршната фаза од подготовките за претстојните два квалификациски дуели за пласман на Европското првенство.
Прв противник в петок во Скопје ни е селекцијата на Украина со која пред две години се сретнавме во фазата по групи на Европскиот шампионат.
“Против Украина игравме на Европското првенство, но мислам дека ова ќе биде сосема поинаков натпревар, иако се разбира дека одредени анализи ќе користиме и од тој наш меѓусебен меч. Во оваа фаза од подготовките претежно се базираме на тактички работи, ја враќаме свежината и се надевам дека максимално ќе одговориме на задачите на селекторот”, рече напаѓачот Милан Ристовски.
Младиот репрезентативец посакува по стартната победа над Малта да освоиме нови три бода и тоа против далеку поквалитетната селекција на Украина.
“Атмосферата е одлична, сите сме мотивирани кога сме во националниот дрес, сакаме да направиме нов успех и убеден сум дека заеднички ќе се бориме за тоа. Украина е силна репрезентација со фудбалери кои играат во големи клубови, но ние играме на домашен терен, очекуваме поддршка од публиката и верувам дека можеме да оствариме позитивен резултат”, заврши Ристовски.
Натпреварот со Украина се игра в петок на арената Тодор Проески и почнува во 20 часот и 45 минути.
ФОТО: Игор Паневски