Кристоф Галтие на вчерашниот дуел против Клермон за последен пат ја водеше екипата на Пари Сен Жермен, а во следните неколку недели по официјализирањето на смената на актуелниот тренер треба да следува и промоцијата на новиот шеф на стручниот штаб.
Иако како главен кандидат за нов предводник на францускиот првак се споменуваше Жозе Мурињо, локалните медиуми најавуваат дека најголеми шанси за преземање на екипата има поранешниот тренер на Барселона и шпански селектор, Луис Енрике.
Како главна причина за поврзаноста на Мурињо и Пари Сен Жемен се сметаше големото пријателство со спортскиот директор Луис Кампос, првиот човек на клубот Насер Ал Келаифи смета дека Португалецот не е најдоброто решение и се залага на чело на екипата да дојде токму Луис Енрике.
Неофицијално Шпанецот дал начелна согласност да се пресели во француската престолнина и се очекува веќе од утре да почнат преговорите за неговиот ангажман во Пари Сен Жермен.
ФОТО: Игор Паневски