Македонската фудбалска репрезентација од утре ги почнува подготовките за почеток на нов циклус квалификации овој пат за настап на Европското првенство што ќе се одржи во Германија во 2024 година.
Прв противник ни е селекцијата на Малта, која има статус на аутсајдер, но никој во нашиот тим не го потценува противникот и најавува максимално залагање за успешен почеток на квалификациите.
“Среќни сме што после неколку месеци повторно се собираме со репрезентацијата на Македонија. Започнуваме нов квалификациски циклус и секако дека посакуваме победа над Малта и старт со три бода. За нас е исклучително важно успешно да ги започнеме квалификациите затоа што потоа ни следуваат многу посериозни натпревари во силната група со Англија, Италија и Украина”, рече Езгијан Алиоски.
Собирот за играчите е закажан за утре, а вечерта ќе се одржи и првиот тренинг. Алиоски очекува дека сите фудбалери ќе бидат подготвени за настап.
“Посакувам сите да бидеме здрави и комплетни и верувам дека ќе го дадеме најдоброто од себе. Ќе се обидеме да одиграме одлични натпревари за успешни квалификации после историските резултати во последните години”, заврши Алиоски.
Натпреварот со Малта го играме на 23 овој месец во Скопје, а четири дена подоцна исто така на арената Тодор Проески не очекува контролен натпревар против Фарските острови.
ФОТО: Игор Паневски