Анонимните дојави за поставени бомби што денеска беа испратени во пет средни училишта во Скопје не ги вознемири средношколците. Наставата од прва смена беше прекината, а учениците и професорите беа веднаш евакуирани од објектите. На оние, пак, што се втора смена, им било кажано да не влегуваат во училиштата, ниту во училиштните дворови додека трае безбедносната проверка.
„Втора смена сме и ни рекоа да не влегуваме во училиштето, ниту во училиштниот двор. Не ни кажаа што е точната причина, но веста за дојава за бомба се рашири меѓу нас учениците“, изјави двајца средношколци од гимназијата „Никола Карев“.
Запрашани дали се плашат од веста за поставена бомба во училиштето, двајцата низ насмевка одговорија негативно и изразија уверување дека станува збор за лажна дојава.
Антитерористички единици на Министерството за внатрешни работи (МВР) сè уште вршат проверки во дел од средните училишта во кои претпладнево беа испратени дојави за поставени бомби. Тоа се гимназиите „Никола Карев“, „Орце Николов“, „Јосип Броз Тито“, „Раде Јовчевски Корчагин“ и АСУЦ „Боро Петрушевски“.