Македонија е умерено подготвена во областа на енергетската политика, констатира Европската комисија (ЕК) во последниот извештај. Комисијата пишува дека е постигнат ограничен напредок, но треба да се забрза транзицијата кон обновливи извори и значително да се намали зависноста од гас.
„Потребите за енергетска диверзификација стануваат итни, додека мерките за подобрување на енергетската ефикасност заостануваат. Економијата се карактеризира со ниска ефикасност во производството и потрошувачката на енергија. Производството на електрична енергија е многу зависно од јагленот, а со намалувањето на домашните резерви на јаглен, од увозот“, пишува во извештајот на ЕК.
„Гасот сочинува околу 11 отсто од производството на струја, а 100 проценти од гасот во земјата се увезува од Русија преку едно поврзување. Поврзувањето со регионалните гасоводи напредува бавно. Работите на гасната интерконекција со Грција сè уште не се почнати. Овој проект ќе поддржи диверзификација на изворите на природен гас и ќе го олесни пристапот до транзитните цевководи“, се вели во извештајот на ЕК.
Што се однесува до безбедноста на снабдувањето, неопходно е да се процени количината на јаглен потребна за да се обезбеди добро функционирање на термоелектраната Битола, вклучително и инвестиции во нови ресурси.
„ЕСМ треба да го подобри работењето и одржувањето на капацитетите за производство на струја, пишува Европската комисија во последниот извештај. Општините се охрабруваат да преземат чекори за целосно почитување на нивните обврски за развој и спроведување на програми за енергетска ефикасност, се препорачува во извештајот на ЕК.