Годинашново, 21. издание на „Офф-фест“, започнува вечерва во Националната опера и балет со концерти на два домашни состави, групата „ Перија“ и дуото „ Добрила и Дориан“.
Групата „Перија“ која изведува т.н. world музика започна како улична група, а за неколку години стигна до настапи на интернационални фестивали во земјава. За тоа време групата изведуваше стари македонски народни песни и почна да создава своја авторска музика, користејќи западни и источни техники на свирење. А, дуото „ Добрила и Дориан“, е проект кој ги спојува пејачката на „Чалгија саунд систем“, Добрила Грашеска и основачот на „Стринг форсис“, Дориан Јовановиќ. Тие минатата година го објавија првиот заеднички албум „Апокриф“, кој вечерва ќе биде премиерно изведен пред публиката.
До 4 јуни кога завршува „Офф-фест“, ќе настапат и музичари од Италија, Мали, Бразил, Колумбија, Гана и од Зеленортските острови.