Премиера на „ Галеб“ од Чехов во Турскиот театар

„ Галеб“ е драма чие дејство се случува во руско село, кон крајот на 19 век. Карактерите се незадоволни од сопствените животи. Некои сакаат љубов, но не ја добиваат за возврат. Некои сакаат само успех, а некои сакаат да ги срушат старите уметнички форми и да изградат нови. Сепак, никој не е реализиран во намерите и среќен. Од тие неисполнети желби Чехов гради студии на карактери со специфично расположение, што се граничи со промашени животи.

ИРИНА НИКОЛАЕВНА АРКАДИНА ја толкува Несрин Таир, КОНСТАНТИН ГАВРИЛОВИЧ ТРЕПЉОВ во алтернации го играат Хакан Даци и Осман Али, БОРИС АЛЕКСЕЕВИЧ ТРИГОРИН му е доверен на Селпин Керим, НИНА МИХАЈЛОВНА ЗАРЕЧНА се игра во алтернација на Стефанија Начевска и Сузан Акбелге, ПЕТАР НИКОЛАЕВИЧ СОРИН го игра Џенап Самет, МАРИЈА ИЛИНИШНА МАША е Ебру Мусли, СЕМЈОН СЕМЈОНОВИЧ МЕДВЕДЕНКО го толкува Неат Али, а ЕВГЕНИЈ АЛЕКСЕЕВИЧ ДОРН е Метин Ибрахим.

Критичарите го опишуваат „ Галеб“ како трагична драма за несреќните луѓе или како комична, горчлива сатира која ја исмева човечката глупост. На што од тоа повеќе е ставен акцент во режијата на Витошевиќ, ќе видиме на премиерата в сабота.

Сценографијата е на Костантин Трпеноски, костимографијата е дело на Роза Трајчевска Ристоска, дизајн на светло направи Васил Христов, изборот на музиката е на режисерката Витошевиќ, фотографи за претставата сними Кире Галевски , а дизајнот на плакат е на Дамјан Момировски.