Пазарните инспектори сè уште не утврдиле дали граѓаните ги испразниле маркетите или трговците криеле роба викендот. Откако во голем број маркети и продавници, рафтовите со некои од основните производи беа целосно празни, вчера, министерот за економија Бектеши кажа дека целосно било утврдено дека некои трговци ги повлекле производите во позадина и дури и се закани со строги казни. Од Државниот пазарен инспекторат велат дека таков прекршок на правилата не се гледа од само една контрола на терен.
Граѓаните се надеваат дека замрзнувањето на маржите може барем делумно да го ограничи профитирањето на дел од трговците во време на Ковид-криза и комплицирана воено-политичка состојба во светски рамки. Вчера, со почетокот на месецот започна да важи и новата мерка на Владата, да се ограничи разликата помеѓу набавната и продажната цена на трговските стоки и тоа на пет отсто за трговците на големо, а десет отсто во трговијата на мало, за најнеопходните прехранбени производи.
Потврда дека дел од храната поскапува стигна од Пазарниот инспекторат. Станува збор за лебот. Во секој град во државата, најосновното ќе се плаќа поскапо.
Од Државниот пазарен инспекторат не одговараат конкретно дали ќе побараат затегната казнена политика и поостри казни за прекршителите на правилата. Велат дека постојано се во разговори со Министерството за економија и се споделуваат информациите од терен. Но, директорката на ДПИ, Симеска – Димоска, не исклучува иницирање на некои законски измени во иднина, а посебно во Законот за трговија.
Петар Догов