Македонија преку Интерпол и Европол ќе бара дали некој злоупотребувал или фалсификувал дипломатска пратка од земјава, откако минатата недела беше објавена информација за наводна заплена на дипломатска пратка во Италија во која се шверцувале цигари и алкохол. Од МНР за Телма информираат дека министерот за надворешни работи, Бујар Османи, писмено му се обратил на министерот за внатрешни работи, Оливер Спасовски, за добивање на дополнителни информации од страна на меѓународните полициски-истражни органи во кои земјава е членка или соработува, за наводна злоупотреба или фалсификување на дипломатска пратка.
МНР претходно информираше дека првичната контрола не потврдила постоењето на ваков случај и не биле пронајдени докази за злоупотреба на дипломатска пратка од вработените во Министерството, а до амбасадите во Париз, Љубљана и во Рим и конзулатите во Венеција и во Солун, досега не е пристигната никаква информација од земјата домаќин за злоупотреба или фалсификување на дипломатска пратка од Македонија.