Со полагање цвеќе на државни и партиски делегации пред споменикот на Гоце Делчев во градскот парк во Скопје се одбележа Денот на македонската револуционерна борба.
Честитки испратија и од државниот врв и од политичките партии. Датумот на основањето на македонската револуционерна организација е пресвртната точка од која започна долгиот и макотрпен пат за создавање на независна македонска држава – порача во честитката претседателот на државата Стево Пендаровски.
„ Без разлика на вера, етникум, идеологија, партиска или каква било припадност да се обединиме околу идејата за демократска, развиена, напредна и просперитетна Република Северна Македонија. Да ги надминеме предизвиците на нашето време, да си ја сакаме и чуваме државата, да не се арчиме со меѓусебни судири и да го оставиме личниот интерес и суетите настрана. Да продолжиме да градиме иднина, инспирирани од родољубието, пожртвуваноста и од хероизмот на нашите револуционери’ – порачува претседателот Пендаровски.