Во текот на вчерашниот ден аплицирани се вкупно 3 845 дози вакцини, од кои 958 се аплицирани како прва доза, 2 813 се ревакцинирани, а 74 граѓани примиле трета доза вакцина, информираше Министерството за здравство (МЗ).
По вчерашниот ден, според пресекот направен од МЗ, вкупно се вакцинирани 792 174 граѓани од кои ревакцинирани се 740 822. Откако е достапна и трета доза, заклучно со вчерашниот ден неа ја примиле 499 граѓани.
Опфатот со вакцинација со една доза вакцина на полнолетната популација е 47 отсто, а со две дози опфатени се 44 отсто од граѓаните над 18 години. Гледано на целокупното население, пак, според бројот на аплицирани вакцини, 38 отсто од целата популација во нашата земја е вакцинирана, а 35 отсто од популацијата во државата примила две дози вакцина.