Најлошото е зад нас – оптимистички гледаат дел од епидемиолозите на актуелната Ковид-состојба во земјата. Во Македонија веќе е детектирана индиската мутација, ги имавме и јужноафриканската, британската и десетици други во изминатите месеци.
Но, во природата на вирусите е да мутираат и засилените рестрикции и општиот страв од зараза не би требало да се повторат како и на почетокот на целата пандемиска приказна, смируваат дел од епидемиолозите.
Најмоќното оружје во борбата со заразните болести, вакцините – сега се веќе на располагање, а вакцинацијата целосно ја менува епидемиолошката слика вели доктор Александар Стојанов.
Според него, последните бројки на новозаразени се занемарливи, а добра вест е и намалениот број на смртни случаи.
„Не е иста ситуацијата како минатата година и не би стравувал дека ќе дојде трети, четврти, петти бран со некој мутиран вирус затоа што вакцините и прележувањето даваат одреден степен на заштита и од овие мутирани вируси. Значи основата ја имаме. И да го добијат новиот вирус некои од луѓето, нема да биде така како што беше претходно односно нема да завршат во болница или да завршат летално“ вели Д-р. Александар Стојанов – Епидемиолог.
Нискиот број на новозаразени и починати во изминатите денови е добра основа за елиминирање на наметнатите рестрикции кои засега се уште остануваат во сила, иако на почетокот на месецот се отстрани и мерката за задолжително носење на маски на отворени, како и низа други ограничувања во однос на угостителите.
Но, и мерки и без – земјата го достигнува задоволителното ниво на колективен имунитет и за доктор Стојанов, тоа е факт.
„Нека продолжи овој тренд на опаѓање на бројот на новозаболени и починати, како и трендот на вакцинирање и тогаш ќе може да зборуваме и дополнително да се елиминираат мерките. Ќе дојде есента, ќе треба децата да одат на училиште. Полека го постигнуваме задоволително ниво на заштита и жал ми е што тоа порано не се случи. Е, сега сигурно дека свадбите се проблем, но со одредени протоколи сигурно тоа ќе се санира“ вели Д-р. Александар Стојанов.
Во меѓувреме, четворица починати од Ковид во изминатото деноноќие, регистрираше Институтот за јавно здравје. Сите починати се над 70 години, и сите во болница.
Направени се 2.853 тестирања, и запишани 23 нови случаи. Со последните податоци, бројот на активни случаи изнесува 451, а од почетокот на пандемијата, починаа 5.462.
Петар Догов