За попладне е закажано заедничкото чествување на сесловенските просветители во Рим, по што се очекуваат и изјавите од македонскиот и бугарскиот претседател.
А премиерот Заев вели дека Македонија нема дилеми да ги испорача гаранциите. Од нас може да се очекува само градење пријателство и соработка, вели Заев по повод изјавата на бугарскиот претседател Румен Радев дека Бугарија сака јасни гаранции за нејзината национална безбедност и нејзините национални интереси.
Во интервју за „Фокус“ тој смета дека претседателот Радев, може да направи позитивен исчекор, со што ќе даде шанса пријателството меѓу Македонија и Бугарија да се развива и да биде поголемо наместо да остави трага меѓу двата народа.
Заев е задоволен од поднесените креативни форми на предлози кои министерот за надворешни на Португалија Аугусто Силва и еврокомесарот Оливер Вархеји неодамна ги соопштија по посетата на Софија и Скопје, и надеж дека на крајот на денот Европската Унија ќе го испорача она што го очекуваме.
За предлогот на опозицијата да се напушти договорот и да се направи нов, со повеќе меѓународни гаранции, премиерот Заев вели дека е многу несериозно да се откаже договор, кој веќе почна да се реализира.
Договорите се обврска на двете страни кои ги потпишуваат, рече Заев, и додава дека за разлика од некои други историски комисии на кои им требале 20 години за да најдат решение, Македонија и Бугарија успеаа за две години да договорат пет историски личности и три периоди за заедничко славење.