Нареднава недела ќе се знае дали Стојко Пауновски заминува од директорското место во Пазарниот инспекторат. Владата најави разрешување, што може да се случи веќе во вторник, а неговите колеги се надеваат дека министрите ќе се премислат, откако ќе ги сослушаат нивните аргументи.
На петицијата што утре ќе биде поднесена во Архивот на Владата, потпишани се над 90 одсто од вработените во Пазарниот инспекторат од сите возрасти, етнички и партиски определби, вели портпаролката Александра Котели. Бараат Владата да земе предвид дека Инспекторатот изразил подготвеност да преземе 12 од предложените 33-ца од програмата К-5 и за нив се прават измени во систематизацијата. Тоа се „рамковно вработени“ со економски или правен факултет, со кои веќе имало интервјуа за нивно конкретно ангажирање. Но, во Инспекторатот не треба да работат детективи, криминалисти и јавна администрација, смета директорот Пауновски, а неговите колеги се согласуваат и дека потребата од кадровско зајакнување е поголема во источниот дел од земјата, а не во западниот. Се зголемува и поддршката на социјалните мрежи, но тој лично не одговара на телефонските повици.
И Владата молчи на прашањето дали ќе има разговори со вработените во Инспекторатот или Пауновски ќе биде разрешен на првата владина седница. Изминативе денови, прво премиерот Заев најави таков одговор на отпорот на директорот, а потоа министрите Љупчо Николовски и Артан Груби испратија заедничко сооопштение.
Не треба да се манипулира јавноста. Ова распоредување е согласно закон и одлука. Ќе има и 104 нови вработувања на инспектори во инспекторатите и тоа не е поврзано со распределбата на вработените заради правична застапеност. Премиерот Заев се обидел да оствари директна комуникација со Пауновски заради изнаоѓање заедничко решение, но тој не одговорил на повикот. За непочитување на одлука на Влада, предвидени се постапки, меѓу кои и разрешување.
Во јануари годинава, Владата реши да им даде работа на над илјада и 300 „рамковно“ вработени во периодот од 2008 до 2015-та. 143-ца треба да преминат во МВР, каде што исто така се појавуваат специфични барања за безбедносни сертификати. УЈП се подготвува да преземе 101, Царината 74-ца. Акцијата треба да ја реализираат 237 институции.
Соња Николовска