Ерменскиот премиер, Никол Пашинијан, во телевизиско обраќање денеска изјави дека поднесува оставка за да може во земјата да се одржат предвремени парламентарни избори.
-Денеска ја поднесувам оставката со цел да се одржат предвремени парламентарни избори на 20 јуни, рече Пашинијан, пренесен од руските медиуми.
Пашинијан претходно најави дека предвремените парламентарни избори ќе се одржат на 20 јуни. Тој, исто така, кажа дека формално оставката ќе ја поднесе во април, со цел да отпочне механизмот за распуштање на парламентот, но дека владата ќе ја предводи до изборите во јуни.
Пашинијан поднесе оставка по неколку месечните протести и повици од опозицијата да ја напушти функцијата, откако повеќе од 3.600 ерменски војници загинаа во 44-дневната војна со Азербеџан, по што Пашинијан беше приморан да потпише мировен договор, и да отстапи голем дел ерменска територија од областа Нагорно-Карабах.
