Универзитетот во Оксфорд го продолжува неодамна сопреното испитување на вакцината против корона вирусот која ја развива во соработка со шведската фармацевтска компанија Астра Зенека.
За време на паузата од испитувањето, независното регулаторно тело за лекови во Велика Британија ги проверило сите податоци за безбедност на вакцината, соопштија од Универзитетот.
„Процесот на независна ревизија е завршен и според препораките на независниот одбор за оценка на безбедноста и британскиот регулатор, испитувањето повторно ќе почне во Велика Британија, е наведено во соопштението. Се истакнува дека сите се посветени првенствено на безбедноста на учесниците и дека ќе биде продолжено по највисоки стандарди.
Клиничкото испитување на вакцината на која работат Астра Зенека и Универзитетот во Оксфорд беше запрено минатата недела откако еден од учесниците беше хоспитализиран. Универзитетот објаснува дека „во вакви големи клинички истражувања, очекувано е некои од учесниците да имаат нис појави, но секој случај мора внимателно да се истражи и да се процени безбедноста“. Во целото истражување досега, вакцината ја примиле 18.000 учесници.
Официјално не беше соопштено што точно му се случило на учесникот во испитувањето, но портпаролот на Астра Зенека објасни дека една жена развила невролошки симптоми, поточно воспаление на рбетниот мозок, што често е поттикнато од вирусни инфекции, поради што беше паузирано тестирањето.
Оксфордската вакцина, според западните безбедносни стандарди, е најблиску до добивање на официјална дозвола за масовна употреба.