Мора внимателно да се одлучи кој модел на настава ќе се избере во Тетово во новата учебна година, бидејќи оваа општина е едно од жариштата со коронавирусот. Треба да се има предвид фактот дека одделенијата имаат поголем број ученици и дека дел од средношколците патуваат. Приоритет мора да биде здравјето на сите, вели раководителот на Секторот за јавни дејности, Ахмед Ќазими.
Одделенската наставничка Соња Трифуновска, водена од долгогодишното работно искуство, смета дека децата од почетните одделенија треба да бидат физички присутни во училишните клупи, додека за поголемите ученици, наставата да се одвива онлајн.
Трифуновска, чија работа во воспитно-образовниот процес е признаена од страна на Бирото за развој на образованието, како една од 100-те просветни работници во земјава за изработка на квалитетни видео лекции, вели дека сега наставниците се поподготвени за онлајн настава, бидејќи дел од нив следеле обуки и вебинари за примена на дигиталните алатки.
За децата од предучилишна возраст, пак, во тетовските градинки се прават анкети со родителите, дали имаат неопходна потреба да ги носат во градинка, за што ќе треба да приложат потврди дека нивната работа не можат да ја извршуваат од дома.
Данијела Билбилоска