Влада која ќе го следи европскиот пат, во целост ќе ги почитува договорот со Бугарија, Преспанскиот и Охридскиот договор, ефикасна Влада која ќе се справува со пандемијата на Ковид 19 и ќе работи на обезбедување повеќе пари, подобри услуги и подобар живот за сите граѓани. Ваква ќе биде програмата на Владата, што мандатарот Зоран Заев има намера да ја состави за помалку од 20 дена. Претседателот Стево Пендаровски го стартуваше уставниот рок, доверувајќи му го мандатот на лидерот на Коалицијата Можеме, која освои најмногу пратенички места.
СДСМ се уште нема поддршка од мнозинството пратеници. Преговорите со ДУИ се отежнати од барањето премиер-албанец. Како победник на овие избори, Заев смета дека тој треба да ја предводи Владата во целиот четиригодишен мандат.
И Али Ахмети не е попрецизен на прашањата поврзани со ротирачко претседавање со Владата. Повикува во преговорите за Влада да надвладее разумот и грижата за интересите на граѓаните.
Заев и Ахмети веќе имаа неколку средби. Последната беше во понеделникот, кога не постигнаа договор бидејќи ДУИ инсистира на поголем дел во поделбата на извршната власт, но и на премиерската функција во првата година од четиригодишниот мандат.
Соња Николовска