Дивоградбата кај „Мавровка“ ќе почека уште најмалку еден месец пред машините да удрат по столбовите и плочата коишто веќе се изградени.
Општината неделава ќе соопшти дали некоја фирма се пријавила на тендерот за уривање бесправни објекти.
Чаир има обврска да го урне објектот откако фантомскиот инвеститор не го испочитува рокот сам да се пријави и да ја урне градбата којашто отпочна да ја гради на своја рака без да поседува градежна дозвола.
Општината бара фирма која со багери и камиони ќе урива и други дивоградби за најмалку еден милион евра.
„Утре е јавното отворање на понудите и по изборот на економскиот оператор ќе се пристапи кон уривање на објектот. Во зависност од текот на набавката и сите фази на постапката истата би требало да заврши во период од 30 дена“ велат од Општина Чаир.
Рокот кој Општината му го даде на инвеститорот сам да го урне бетонското здание веќе е изминат.
Во тендерот за уривање од страна на Општина Чаир се наведува дека цената е главниот критериум за избор на најповолната понуда.
Сега местото треба да се врати во првобитната состојба бидејќи не постои начин да се легализира тоа што се гради – информираа уште претходно од општинските служби.
И додека дивоградбата кај „Мавровка“ од почетокот на јули им е обврска на надлежните институции – една од нив, Општината Чаир се уште не информира уште колку други вакви бесправни објекти чекаат тендер за да бидат урнат.
Доколку Општина Чаир не ги спроведе законските обврски, идната Влада може да им ја одземе ингеренцијата и обврската за уривање да ја предаде на Државниот градежен инспекторат.
И Обвинителството се уште не открива кој е инвеститорот, иако отвори предистражна постапка и заедно со полицијата побара од Катастарот информации за сопствеништвото на парцелите пред трговскиот центар „Мавровка“.
Петар Догов