Писателот, историчар и борец за макендската кауза, Ѓорги Абаџиев, почина на денешен ден, пред 57 години. Но, семејството кое денеска отиде на неговиот гроб , во „ Бутел“, да одржи помен за нивниот татко и дедо, со години се судира со грдата слика. Скршена е половина од надгробната плоча од почивалиштето на Ѓорги Абаџиев, кое се наоѓа во алејата на великаните. Семејството е немоќно да превземе било што.
Приватните сопственици на АД Бутел, не дозволуваат да се интервенира врз гробот. И покрај тоа што ние бевме спремни сами да го платиме сето тоа. Ги вратија работниците. Ние се обративме неколку пати до директорот. Меѓутоа , тој ништо не направи во таа смисла, вели соња абаџиева, ќерка на ѓорги абаџиев.
Гробот на Абаџиев го разградуваат корени од липово дрво, што се наоѓа тука и ја кршат надгробната плоча. Но неговиот, не е единствен девастиран гроб. Ги има повеќе на истакнати личности од политичкиот и културниот живот и веќе не се препознаваат чии се, вели Соња Абаџиева. Таа е незадоволна од односот на надлежните, зашто смета дека тој дел од гробиштата го заборавиле. Испратиле писмо и до Град Скопје, но веќе една година чекаат одговор.
Од АД Бутел за Телма велат дека немаат ингеренции за било каква интервенција зашто Абаџиев почива во алејата на великаните, а за тоа е надлежен Град Скопје. А, од Градот за Телма потврдија дека добиле барање од семејството на познатиот лектирен писател и дека наскоро ќе започне санацијата. Ќе се реставрира не само гробот на Ѓорги Абаџиев, туку и руинираните вечни почивалишта на останатите во алејата на великаните.
Сотир Трајков