Санацијата на патот од Тефериќ до Сопиште ја презема Министерството за транспорт и врски откако се утврдило дека општина Кисела Вода и Град Скопје немаат можности да го реализираат проектот.
Патот е распукан и пропаднат повеќе од година и половина поради свлечиште – се работи за 70 метри асфалт кој треба да се санира. Од безбедносни причини, околу свлечиштето е направен земјен насип и забрането е минување, но и покрај тоа има возачи кои се обидуваат да поминат по оваа делница.
Како што денеска соопшти вицепремиерот и министер за транспорт, Александар Николоски, следната недела ќе биде официјално објавен јавниот повик за избор на градежна фирма која ќе изврши стабилизација и санација на овој критичен терен.
„Тoa e еден голем, исклучително сериозен проблем, имајќи предвид дека се работи за сериозно свлечиште. Проблематиката е далеку поголема од можностите и капацитетите што ги имаат Општина Кисела Вода и Град Скопје. Затоа премиерот Мицкоски реализира една координација на работна средба помеѓу нас, Општината и Градот.
И овој вторник, на седница на Владата, донесовме одлука, со која целокупниот проект го презеде Министерството за транспорт. Веќе имаме изработено проект за стабилизација и санација и очекувам најбргу што може, а тоа е непосредно следната недела, да излезе тендерот за избор на изведувач. Потоа, некаде за месец-месец и пол, кога ќе се избере изведувач, да можеме да работиме на санација и пред почетокот на зимата таа санација да биде завршена, така што целокупната проблематика ја презеде Владата преку Министерството за транспорт“ – изјави Николоски одговарајќи на новинарско прашање при посетата на општна Кисела Вода.
https://telma.com.mk/2026/07/01/neproodni-patishta-zhitelite-na-kisela-voda-i-sopishte-bez-alternativen-pravecz/