Во Ерменија е во тек гласање на избори кои би можеле да одлучат дали земјата ќе продолжи да се движи кон Западот или ќе се врати кај својот традиционален сојузник Русија.
Малата земја од Јужен Кавказ со три милиони жители е под зголемен економски притисок од Москва, бидејќи премиерот Никол Пашинјан се стреми кон реизбор со ветување за европска интеграција.
Изборите привлекоа значително меѓународно внимание кон Ерменија, која постојано се приближуваше кон Западот, а сепак е испреплетена со Русија, нејзиниот најголем трговски партнер.
Зближувањето со Западот е во голема мера дело на Пашинјан. Откако дојде на власт во 2018 година, премиерот ја оддалечи својата земја од Москва, донесе закон за започнување на процесот на пристапување кон ЕУ и го забрза мировниот процес со соседниот Азербејџан преку договор посредуван од САД.
Вториот му ја донесе поддршката од американскиот претседател Доналд Трамп. Пашинјан, исто така, беше домаќин на голем самит на лидерите на ЕУ и украинскиот претседател Володимир Зеленски во главниот град Ереван, претходно оваа година.
Сепак, и покрај овие успеси, домашната поддршка на Пашињан падна од 54% во 2021 година на околу 30% денес. Главната причина е Нагорно-Карабах, планинска енклава во Азербејџан, која беше дом на 100.000 етнички Ерменци сè додека Азербејџан не ја зеде со сила во 2023 година.
Критичарите на Пашинјан никогаш не му простија што направи отстапки во корист на мирот со Азербејџан, како што е одбивањето да води кампања за ослободување на поранешните лидери на Нагорно-Карабах кои се во затвор во соседната земја.
Јавноста во Ерменија исто така е длабоко поделена во однос на мировниот договор со Азербејџан. Една неодамнешна анкета покажува дека 44% од јавното мислење го поддржува, а 41% е против.
© 2020 Телевизија Телма. Сите права се задржани.
Овој текст не смее да се печати или емитува, во целина или во делови, без договор со Телевизија Телма.