Основното јавно обвинителство Битола отвори истражна постапка против 28-годишен маж, осомничен за обид за убиство на својата баба, при вршење семејно насилство во домот каде заедно живееле.
Делото е квалификувано како „Убиство во обид“. Според обвинителството, на 17 јануари осомничениот ја блокирал влезната врата од куќата на улицата „Лавчанска корија“, по што со раце ја удирал жртвата по главата и телото сè додека не паднала во бессознание.
Жената се здобила со тешки телесни повреди, вклучувајќи крварења и нагмечување на мозокот, скршени ребра и исчашувања, со што ѝ бил загрозен животот. По настанот, осомничениот избегал, но набрзо бил приведен.
Обвинителството побара притвор поради опасност од бегство и можност за влијание врз сведоци, а поради сомнежи за нарушена психичка состојба, предложено е тој да биде испратен на психијатриска опсервација и вештачење во Психијатриската болница во Демир Хисар во траење од најмалку еден месец.
