Спој на класична музика и раскажување приказни со драмска игра. Вака денеска пред најмладата публика на Македонската филхармонија беше изведена светската премиера на симфониската суита „ Итар Пејо“, од нашиот композитор Филип Иванов. На концертот, со оркестарот на нашата Филхармонија диригираше маестра Бисера Чадловска. Кога се работи за музика за деца, најважни се ефектите што таа ќе ги постигне кај нив, вели Чадловска.
- „Значи, многу да се изразат тие динамички елементи, најмногу ударните инструменти да се слушнат. Можеби диригентот по свое да додаде некои елементи во партитурата, кои што композиторот можеби не ги напишал“ изјави Бисера Чадловска- диригент.
Изведбата на симфониската суита „ Итар Пејо“, беше конципирана како колаж од музички фрагменти и приказни за итриот и снаодлив селанец од Мариово, кој го претставува македонскиот непокор и шегобијна мудрост. Неговите доживувања со даночниците, владетелите и селаните, со порака за прифаќање на разликите и потреба од заедништво, пред учениците од неколку скопски училишта ги долови , во улога на наратор, актерот Мартин Јорданоски.
„Едноставно , поприемчиво да ги добијат , да ги примаат кај нив како информација“ изјави Мартин Јорданоски- актер.
Композицијата е поделена на седум делови , со поднаслови кои укажуваат на течението на нарацијата. Таа на крајот беше поздравена со голем аплауз од учениците.
Симфониската суита „ Итар Пејо“ е прво дело од македонски композитор, кое е наменето за деца и млади, а кое обработува лик од нашата фолклорна традиција. Оваа композиција беше една од наградените, на минатогодишниот конкурс што го распиша Македонската филхармонија, за откуп и афирмација на дела од домашни автори, наменети за симфониски оркестар.
Сотир Трајков