Големи снежни врнежи го изолираа мавровското село Никифорово, а според информациите од терен кои со Телма ги споделија очевидци, во моментов нема како да се пристапи до нив бидејќи патот е блокиран, а жителите се заглавени и немаат струја.
Според информациите во регионот наврнале над 80 сантиметри снег.
Поради обилниот снег не функционираат ни Општина Маврово ниту Општина Ростуше.
Мавровското село Леуново е парализирано поради снегот, коj вчера и денес врнеше на повисоките места низ државата.
Иако од Јавното претпријатие „Македонија пат“ информираа дека сите патишта се проодни, сепак гостите на Хотелот „Радика“ во Леуново се заглавени.
Според последното соопштение на УХМР, пак, најмногу снег има во Маврови Анови – 68 сантиметри, 51 см на Попова Шапка, 25 во Лазарополе и 5 см во Берово.