Средба со министерот за правда Филков и повлекување на Предлог-законот за извршители кој што во моментов е на ЕНЕР, бараат од Конфедерацијата на синдикални организации (КСОМ)„. Сите нивни забелешки и предлози да бидат вклучени во овој закон, затоа што со години наназад се потврдува дека истиот најмногу ги засега работниците и ранливите категории граѓани.
„Имаме примери за градски паркинг за 50- 60 денари за граѓани од Куманово за кое им дојде извршно решение за 17.000 денари. Се прашувам дали ова Министерство е за правда или за неправда. Еве министерот е две години на власт и се прашувам дали го слуша гласот на народот“, изјави Марјан Ристевски, претседател на КСОМ.
Бараат доверителите директно да ги доставуваат решенијата на граѓаните кои должат, не преку нотари и адвокати кога сумата се зголемува неколкукратно. Во однос на честите забелешки дека адвокатите не можеле да ги најдат должниците на домашната адреса, во тој случај да се користи системот „Безбеден град“ кој покажува дека и тоа како може да се најдат.
„Тука се работи за, верувајте, милионски суми на пари. Има некаде околу 200.000- 300.000 предмети. Замислете која сума на пари е тоа. Ако граѓанинот должи сега сметка од 1.000 денари, да плати една нормална сума од 1.500 денари. Зошто овие дополнителни трошоци? – Законот за извршување треба да биде граѓанинот да си го плати главниот долг, а не да ги богатиме адвокатите, нотарите, изршителите, трошоци, глупости да измислуваме“, додава Ристевски.
Да бидат разгледани застарените предмети преку 20-30 години и ако мора да се плати, тоа да биде главниот долг, вели Ристевски. Доколку не бидат земени предвид нивните забелешки, тие најавија протести.
Нина Стефанова