Освен рингишпилот на лунапаркот, во круг се вртат надлежните кој издал дозвола, а кој треба да ја контролираа работата на Зимзоленд. По реакциите на околните жители, Телма се обрати до организаторот на забавниот парк, кој потврди дека имал договор за закуп и дозвола за работа од општина Аеродром. Но, оттаму негираат за одговорност. Градоначалникот на општина Аеродром, Дејан Митески вели дека станува збор за приватен објект и тие како општина можеле само да му укажат да го среди просторот да не биде запуштен. Додека за дозвола за поставување на опрема посочија дека е надлежен Град Скопје. Од градот пак за Телма велат дека тие немаат дадено дозвола бидејќи тоа е надлежност на општината Аеродром. Додека одговорните бегаат од одговорноста, не стивнува атмосферата. Музика и детска смеа во Зимзоленд во Лисиче. Најмалите уживаат и велат дека сакаат пак да дојдат.
„Јас во Зимзоленд си поминав многу убаво. Овде бев и минатата година и си поминав прекрасно. Сакав да ги пробам сите работи, но не успеав. Се надевам дека другиот пат кога ќе дојдам ќе си поиграм повеќе. Би им препорачала на моите другарчиња да дојдат овде за да си поминат убаво“ , раскажуваат најмалите.
Но, додека децата си играат и се забавуваат, за нивните родители паркингот е голем проблем. Во околината на Зимзоленд се создава вистински сообраќаен хаос, особено во вечерните часови. Возила паркирани по тротоарите, по коловозните ленти, па дури и на тревникот кај детското игралиште. Станарите од околните згради алармираат дека паркинзите им се блокирани и дека навечер не можат ниту да влезат во сопствените маала. Во МВР поставивме прашања дали дел од возачите се казнети и како планираат да се справат со хаосот, но засега нема одговор. Зимскиот парк ќе работи до почетокот на јануари.
Тамара Марковска
Б.С.