На оценка зголемувањето на септемвриските пензии за илјадарка, а во прашање и илјадарката која пензионерите треба да ја земат дополнително на пролет. Уставен суд на сопствена иницијатива ќе преиспитува дали зголемувањето од вкупно 2.000 денари е во согласност со уставот. Судот одлучи да отвори предмет за линеарното покачување, бидејќи смета дека се повредени правата на пензионерите и тоа со последните измени на законот кои ги донесе власта. Спорно е тоа што во членот, кој е изменет при пресметката на покачувањето, не се води сметка за должината на работниот стаж, за висината на пензијата и придонесите кои се плаќани.
„Уставниот суд во оваа фаза од постапката изрази сомнеж дека оспорениот член 2 ги нарушува уставните принципи за социјална праведност, еднаквост на граѓаните како и правната сигурност и легитимните очекувања како правни принципи. Имено, се постави прашањето дали оспорената одредба продуцира дискриминација по основ на износот на пензија и нееднаквост помеѓу примателите на пензии, односно оние пензионери кои имале подолг работен стаж, повисоки уплати во пензискиот систем и повисока основица, добиваат помало зголемување на пензиите, наспроти пензионерите со пониските пензии“, информира Уставниот суд.
Измените ги донесе Собранието на крајот на јули, а повисоките пензии на пензионерите и беа исплатени од 1 септмеври, а следното линеарно покачување требаше да биде на 1 март. Пресметката за начинот на кој ќе се добие линеарното покачување пропишано со новиот член е сомнителна за судот.
„Со поведувањето на постапка за оценување на уставноста на оспорениот член, Уставниот суд ќе испитува дали законското решение е оправдано и во доволна мера избалансирано“, додаваат од Уставен.
Предлогот е на судијата известител Добрила Кацарска, а бил прифатен од мнозинството судии. Претходно на пензионерите линеарно им беа зголемени пензиите во два наврата за вкупно 5.000 денари, но ова веќе е застарен предмет. Со измените на законот е вметна одредба и дека пензиите се исплаќаат на територијата на државата. Оние кои живеат во странство ја оспорија ваквата одлука па уставниот суд и за ова има добиено иницијатива за која допрва ќе одлучува.
Билјана Николовска Тодорова