Уставниот суд денеска ќе разгледува иницијативи за оценување на уставноста на законски одредби и членови од Законот за пензиското и инвалидското осигурување, познат како „линеарно зголемување на пензиите“. Подносителите тврдат дека измените се дискриминаторски, бидејќи секој пензионер ќе добие ист износ на покачување од 2.500 денари, што значи различен процент по пензионер во зависност од висината на пензијата.
Иницијативата ги оспорува членови 3 и 18 од законот, наведувајќи дека тие се спротивни на принципите на пензискиот систем и на Уставот, вклучително членови за рамноправност, право на сопственост и социјална правда. Подносителите истакнуваат дека пензиите не се социјална помош, туку резултат на индивидуалните уплати во Фондот за ПИОМ, и дека сегашниот систем предизвикува нерамноправност меѓу корисниците на пензии.
Уставниот суд ќе одлучува дали овие одредби се усогласени со уставните начела, а одлуката ќе има влијание на начинот на кој ќе се зголемуваат пензиите во иднина и на заштитата на правата на сите пензионери во земјата.