Царинските инспектори на граничниот премин „Табановце“ спречија обид за нелегално изнесување голема количина на девизи од земјава. Кај српски државјанин, кој тврдел дека носи помалку од 1.000 евра, при претрес на неговото возило биле пронајдени 94.000 евра, без документи за потекло, од кои 44.000 евра биле скриени под машка јакна на совозачкото седиште во црна рачна торбичка, а дополнителни 50.000 евра во багажниот простор во црна кожна торба.
Лицето не ги пријавило парите, што претставува кршење на Законот за девизно работење. Согласно законските одредби, на лицето му биле вратени 10.000 евра кои може да ги изнесе без пријава, додека преостанатите 84.000 евра се привремено одземени од страна на царината за понатамошна постапка за утврдување на потеклото на девизите.