Примирјето меѓу Израел и исламистичката група Хамас останува на сила и покрај обновените размени на оган во Појасот Газа, изјави синоќа американскиот потпретседател Џ.Д. Венс, јави ДПА.
„Примирјето се почитува. Тоа не значи дека нема да има мали престрелки тука и таму“, рече Венс цитиран од американските медиуми.
Израелската влада соопшти дека извршила воздушни напади во Газа како одговор на нападот врз израелските војници, додека Хамас негираше одговорност. Тврдењата не можеа независно да се потврдат.
„Волстрит џурнал“ цитираше американски функционер кој рече дека Вашингтон бил информиран однапред за израелските напади и очекувал целни напади. Израел нема намера да го загрози примирјето, додаде функционерот.
И американскиот претседател Доналд Трамп изјави дека примирјето во Газа не е загрозено откако Израел вчера лансираше воздушни напади поради убиството на израелски војник.
– Колку што разбрав, тие убиле израелски војник. Израелците возвратија и треба да возвратат во таква ситуација. Ништо не е загрозено. Хамас е многу мал дел од мирот на Блиски Исток и мора добро да се однесува. Ако Хамас се добри, ќе бидат среќни, а ако не се добри, нивните животи ќе бидат уништени. Никој не знае што се случило со израелскиот војник, но Израел вели дека тоа бил снајперски оган. И нападите биле одмазда и мислам дека имаат право да го сторат тоа – кажа Трамп.
Во понеделникот, палестинската милитантна група предаде делови од тела што Израел ги идентификуваше како остатоци од заложник пронајден претходно. Прекинот на огнот, кој започна на 10 октомври, беше кревок, со повремени разгорувања. Ситуацијата останува напната, со постојани предизвици за одржување на мирот во земјата.