Украина очекува фонд од околу 2,9 милијарди евра за купување оружје од САД, изјави украинскиот претседател Володимир Зеленски. Средствата ќе дојдат преку финансискиот механизам, кој ги собира придонесите од земјите членки на НАТО, освен САД, и ќе се користат за набавка на американско оружје, муниција и опрема.
Зеленски потврди дека испораките ќе вклучуваат проектили за системите „Патриот“ и муниција за ХИМАРС. И покрај дипломатските напори за мир, војната меѓу Украина и Русија продолжува, а последните руски воздушни напади предизвикаа сериозни оштетувања на украинската инфраструктура.
Во нападите беше погоден и јужниот регион Херсон, каде што беа повредени и цивили. Покрај воената помош, САД и Украина ќе формираат фонд за инвестирање во украинскиот минерален сектор со иницијален капитал од 150 милиони долари. Средствата ќе бидат наменети за поддршка на реконструкцијата и развојот на енергетика, инфраструктура и критични минерали, со цел да се финансираат три проекти до крајот на 2026 година.