Во 89-та година од животот почина прочуената хрватска пејачка Габи Новак.
Габи Новак е родена на 8 јули 1936 година во Берлин, како ќерка на Хварчанецот Ѓуро Новак и Германката Елизабет Рајман. Детството го поминала во Берлин и на Хвар, а подоцна се преселила во Загреб, каде што завршила Школа за применета уметност, насока графика. Кратко време работела како цртачка во Загреб филм, во студиото за цртани филмови.
Непогрешливиот глас на Габи Новак ја направи една од најомилените пејачки на југословенската музичка сцена од крајот на 1950-тите. Нејзиниот репертоар опфаќаше поп и џез музика, а уште во 1960-тите уживаше голема популарност и признание од критиката.
Во текот на својата богата кариера сними голем број албуми и синглови, соработувајќи со врвни композитори и музичари. За своите уметнички достигнувања доби бројни награди, меѓу кои и повеќе „Порин“ награди: во 2002 за најдобра џез изведба, во 2003 за албум на годината, најдобар женски вокал, најдобар поп албум и најдобра вокална соработка, а во 2006 година ја доби и наградата за животно дело.
